Културно уметничкото друштво „Илинден“ од Битола освои сребрен медал на светскиот фолклорен натпревар „World Folk Dance competition“ во Истанбул, Турција, како и парична награда од 3.000 долари во категоријата автентичен фолклор.
На светскиот фолклорен натпревар во Истанбул, ансамблот на КУД „Илинден“-Битола настапи со сценската адаптација „Русински мегдан“ подготвена од м-р Љупка Стефановска, орото „Машка копачка“ и женската песна „Седело Ѓуре дос“.
На натпреварот учествуваа 41 фолклорна група, од кои 21 се натпреваруваа во категоријата автентичен фолклор, а 20 во категоријата стилизиран фолклор. Во оваа силна меѓународна конкуренција, првото место го освои Република Башкортостан (Русија), а третото место му припадна на Црна Гора.
-Ова признание е потврда дека македонската песна, игра и традиција продолжуваат достоинствено да се претставуваат и да оставаат силен впечаток на меѓународната сцена, објавија од КУД “Илинден“ Битола.
