Офицерскиот дом во Битола синоќа беше преполн. Голем број планинари, членови на планинарски клубови и љубители на планината го проследија предавањето „Безбедно движење во планина во зимски услови“ во организација на Федерацијата за планинарство на Северна Македонија (ФПСМ), со поддршка на Општина Битола и на КИЦ – Битола.
Огромниот одзив, токму на прагот на зимската сезона, покажа дека безбедноста во планина е тема што ги обединува сите планинари, од почетниците до најискусните.
Пред почетокот на предавањето, на присутните им се обрати претседателот на ФПСМ, Даниело Божиновски, кој ја поздрави многубројната планинарска заедница и им се заблагодари на Општина Битола и на КИЦ – Битола за поддршката. Божиновски најави дека 2027 година ќе биде година на интензивна активност на Федерацијата. Приоритети ќе бидат подобрувањето на планинарската и пешачката инфраструктура, пред сè планинарските и пешачките патеки, работата со компетитивните планинарски спортови, развојот на регионалните ограноци на Федерацијата, како и директната работа во самите планинарски клубови.
„Подобрувањето на инфраструктурата веќе започна, и тоа токму од Пелистер“, истакна Божиновски. Во соработка на ФПСМ со проектот Славков, поддржан од амбасадите на Австрија, Чешка и Словачка, по 40 години е обновена зимската маркација на потегот од Ниже Поле до Големо Езеро, поставени се патокази до врвот Пелистер, а планинарскиот дом на Големо Езеро доби електрична енергија од обновливи извори.
„Предавањата и обуките не смеат да останат само на Федерацијата. Тие треба да живеат во клубовите, затоа што токму таму доаѓаат новите членови и таму се градат навиките за безбедно движење во планина“, порача Божиновски.
Предавачите Петар Нолев и Бобан Блажевски ги поминаа сите клучни сегменти на зимското планинарење. Во делот за техничката опрема зборуваа за правилниот избор и употреба на цепинот, дерезите и јажето, но и за облеката, обувките и останатата опрема без која зимската тура не смее да започне. Посебно внимание посветија на подготовката на зимска акција – планирањето на маршрутата и на времето за движење во краткиот зимски ден, проценката на сопствените можности и на групата, како и важноста некој секогаш да знае каде се движиме и кога се враќаме. Дел од предавањето беше посветен на читањето и следењето на временската прогноза, на препознавањето на брзите промени на времето во планина и на одлуката за враќање кога условите не се добри. Предавачите зборуваа и за најчестите несреќи во планина во зимски услови – лизгање на замрзнат терен, потхладување, губење на ориентација и лавини – за тоа како тие најчесто настануваат и како можат да се избегнат, како и за правилното однесување и повикувањето помош кога несреќата сепак ќе се случи. Заедничка порака на сите теми беше дека безбедното движење во планина во зима не започнува на патеката, туку дома – со добра подготовка, соодветна опрема и одговорни одлуки.
По предавањето се разви дискусија во која присутните поставуваа прашања, бараа совети за конкретни ситуации и споделуваа сопствени искуства од планина.
На крајот на предавањето, Божиновски уште еднаш ја нагласи потребата од постојана едукација и упати апел до претседателите на клубовите да работат со своите членови на едукацијата за безбедност и движење во планина, а особено со новите членови кои штотуку влегуваат во планинарските спортови. „Целта ни е едноставна – повеќе луѓе во планина, и сите да се вратат дома“, заклучи тој.
Предавањето беше и повод за работна средба на претседателот Божиновски со претседателите и претставниците на планинарските клубови од југозападниот регион, одржана непосредно пред настанот, на која се разговараше за соработката меѓу клубовите и Федерацијата и за планираните активности во регионот.
Сашо Ристевски
