Градоначалникот на општина Битола – Тони Коњановски и амбасадорот на Европската унија – Дејвид Гир, во присуство на министерката за култура – Бисера Костадиновска-Стојчевска денес во Офицерскиот дом во Битола, претседателката на Советот на Општина Битола – Габриела Илиевска советници и други, потпишаа Меморандум за разбирање за отворање на “Куќа на Европа“ во Битола.Амбасадорот Гир, се заблагодари за соработката со градоначалникот Коњановски и локалната администрација, нагласувајќи дека:
“Куќата на Европа“ треба да претставува место за младите луѓе, каде што тие ќе се собираат, со цел да разговараат за важни прашања кои се поврзани со идниот правец кон Европската унија и нивната иднина, како идни граѓани на Европската унија.
-Ние секогаш би сакале кога зборуваме за „Europe Houses“ да зборуваме како за некој вид прозорец. Со прозорците, секогаш можете да видите во двата правци. Првиот правец на којшто може да гледаат младите, локалното население, е правецот на Европската унија, односно да гледаат на патот кој што ги води кон ЕУ. Второ, прозорец низ кој локалното население, не само во Вашата земја, туку и во земјите членки на Европската унија, може исто така, да го видат огромното богатство, огромното културно наследство, што сите Вие како земја, меѓутоа и како град Битола, што може да го понудите на Европската унија. Сега ќе го отвораме „Europe House“ во овој дел од оваа зграда, но го отвораме на начин што целосно го почитуваме културното наследство и минатото на оваа зграда која што навистина има уникатна личност. Сето тоа што ќе го направиме со отворањето на „Europe House“ на ова место, е да го пополниме со човечки глас, со млади луѓе, со идеи и дискусии.Ние навистина се надеваме дека сите тука, граѓаните на Битола, граѓаните од овој регион, па дури и подалеку, да го гледаат „Europe House“, како наша куќа, како наш дом, изјави Евроамбасадорот Дејвид Гир.
Градоначалникот Коњановски, нагласи дека:
-Битола, отсекогаш била европски град и град со големо културно историско наследство за што потврдуваат и различните историски периоди и цивилизации кои поминале на овие простори, сочуваните приказни на Хераклеја Линкестис, битолскиот Завод и музеј, Широк Сокак, Старата чаршија, бројните конзулати кои говорат за конзулска Битола, филмска Битола која и денес го негува ликот и делото на првите сниматели на Балканот, Браќата Манаки… и додаде:
-Со денешното потпишување на меморандумот за разбирање, Битола продолжува европски да се развива и преку соодветно организиран простор, кој ќе биде наменет пред се за младите, за средби, дискусии, учење, информирање. Тоа значи дека, продолжуваме со активности кои значат функционалност, одржливост и успешност на еден проект, реализиран со финансиска поддршка од Европските фондови, а тоа е реконструираниот објект на Офицерскиот дом. Дополнителна потврда за нашиот ангажман и тендеција за овој културно – историски споменик да блеска во сиот свој сјај се и податоците од работата на Културно информативниот центар, кој го организира работењето на Офицерскиот дом, а кои говорат за реализирани: 123 концерти, 25 тетарски претстави, 10 мултимедијални настани, 17 изложби и исто толку промоции на книги и поетски настани. Вкупно, тоа за изминатата година за Офицерски дом и Кино Манаки, значи реализирани над 400 настани со над 65.000 посетители. Горд сум, што овие бројки, целосно ги негираат, политичките тврдења, со кои од ова место, минатата година, бев непотребно обвинуван, токму на тема: Офицерски дом. На овој начин, продолжуваме и понатаму, да ја развиваме културата во нашиот град, да бидеме поддршка за младите генерации, а Битола повторно да биде атрактивна културно – туристичка дестинација, која ќе го сочува и презентира своето културно историско богатство.
На денешниот настан во Битола, присуствуваше и министерката за култура, Бисера Костадиновска Стојчевска, која рече:
-И денеска, драго ми е што гласот на моите сограѓани битолчани беше помоќен од “дуинг-бизнисот“. Овој раскошен објект, чии темели се поставени пред 114 години, беше осакатен и, во февруари 2016-та, беше ставен на продажба. Со гласноста на битолчани, аукцијата беше повлечена, а со поддршка од ЕУ и од претходниот советнички состав на Општина Битола и локалната самоуправа, на Офицерскиот дом му се вратени убавиот лик и достоинството. Минатата година, со одлука на Владата, го прогласивме за културно наследство од особено, големо значење, со што објектот ужива највисок режим на заштита, каков што и му прилега.
Пред потпишувањето на Меморандумот на евроамбасадорот Гир, градоначалникот Коњановски, министерката Костадиновска-Стојчевска директорката на КИЦ “Битола“ – Лили Бошевска им го претстави Офицерскиот дом, ликовните поставки и останатите содржини.
![](https://i0.wp.com/bitolanews.mk/wp-content/uploads/2023/02/oficerski-16-88.jpg?fit=1000%2C608&ssl=1)
Градоначалникот Коњановски и евро амбасадорот Гир потпишаа потпишаа Меморандум за разбирање за отворање на “Куќа на Европа“ во Битола (фото)
More from ВестиMore posts in Вести »
- Еурофарм Пелистер започна со победа во новата сезона
- Прв суперлигашки предизвик за браќата Илиевски, ќе го судат дербито Алкалоид-Вардар
- Пивски ден, пивска ноќ, во Битола на фестивалот “Бирарија“ за занаетчиско пиво (фотогалерија)
- Уште од 5 часот утринава големи гужви на граничниот премин “Меџитлија“ патни исправи се проверуваат во три колони
- Поема на Игор Трајковски Фоја од Битола наградена на престижниот настан Verbumlandiart – Regina Resta