Билтен на МВР: двајца битолчани фатени на дело-краделе нафта во рудникот Брод-Гнеотино, пребрзо возеле 61 возач

Полициски службеници од Полициското одделение Новаци лишиле од слобода две лица на возраст од 37 и 30 години од Битола за кражба на нафта од работна машина од рудникот Брод-Гнеотино. Тие биле затекнати при обид од рудникот да изнесат повеќе туби и балони со нафта која ја извадиле од работна машина со која работеле. Кај нив биле пронајдени околу 100 литри нафта, што биле вратени на сопственикот и други предмети со кои го извршиле делото. Лицата биле задржани во полициска станица и по целосно документирање на случајот против нив ќе биде поднесена соодветна пријава.

Од 8 до 12 часот денеска на територијата на СВР Битола се казнети 61 возач за управување возило со брзина поголема од дозволената, во рамки на засилена акциска контрола на полицијата. Од нив, 41 возач ја пречекорил брзината во населено место, а 20 надвор од населено место. На сите прекршители им се изготвени соодветни поднесоци, информира Министерството за внатрешни работи.  МВР наведува дека засилените акциски сообраќајни контроли продолжуваат и во наредните денови и апелира до граѓаните да ги почитуваат сообраќајните правила и прописи за да се зголеми безбедноста во сообраќајот.