Попладнево на стадионот “Петар Милошевски“, под Тумбекафе во Битола официјално беше отворена новата фудбалска сезона 2025/26 во која екипата на Пелистер ќе се обиде да биде стабилен прволигаш.
Денес “пелистерци“ започнаа и со нов борд на директори, на чело со Александар Стефановски, кој во име на Општина Битола им се обрати на фудбалерите и стручниот штаб, при што рече:
-Оваа сезона тимот на Пелистер ќе го раководи нов Управен одбор составен од вработени во Општина Битола, а да напоменам дека Општина Битола и стопроцентен акционер на клубот. Јас како одговорен за спорт ќе бидам и генерален извршен директор на ФК Пелистер АД и во мое име и во име на Општината сакам да ви посакам добредојде во оваа сезона во која започнуваме и со нов тренер, битолчанецот Димитар Капинковски.
-Сакам да ви посакам успешна сезона, без повреди, а ние очекуваме од вас да дадете се од себе, да се посветите на подготовките и тренинзите, кои не се само физички тренензи туку имаат и за цел да се сплотите, да бидете едно семејство. Ние сме тука за се што ви треба, за време на работното време сме во Општина Битола, а преку тренерот и капитенот секогаш сме отворени за вас, рече Стефановски.
Од пред десетина дена нов шеф на стручниот штаб е Димитар Капинковски.
Капинковски на првата прозивка искажа благодарност до Управниот одбор за довербата која му е дадена по четири години да биде повторно во клубот на чело на стручниот штаб.
-Голема е чест и обврска да се биде на чело на клуб како Пелистер кој секогаш се залага за подобри успеси од сезона во сезона. Оваа година лигата има три екипи кои испаѓаат, а две екипи играат бараж и ќе биде доста тешка сезона. Ние го прифативме предизвикот, и јас и вие, и мораме тоа да го оправдаме.
Во стручниот штаб со Капинковски ќе бидат Вангел Алтипамаковски, Борче Маневски, Горан Пашовски и Саше Велјановски.
По прозивката се одржа и првиот тренинг кој беше и тест за фудбалерите, а од утре започнуваат со тренинзи. 
Од ланската екипа присутни беа само дел од фудбалерите со постоечки договори и оние кои летово потпишаа нови (Ристевски, Гроздановски, Миленковски, Трајковски, Наумоски, Керим), како и најзвучно засилување е враќањето на Стефан Спировски.
Кон првиот тим се приклучени и најталентираните младинци Јован Мрмарчевски, Андреј Мурговски и Ерџан Фејзуловски.
-Главната цел е стабилизација, без проблеми да останеме во Првата лига, со надеж за пласман на погорните позиции. Во текот на подготовките ќе дефинираме уште некои работи и ќе се обидеме правилно да ја темпираме формата. Ќе добиеме нови играчи и затоа ќе работиме на воигрување на тимот. Се надевам дека ќе донесеме правилни одлуки, кои ќе резултираат со посакуваниот епилог, рече Капинковски.
Во име на фудбалерите зборуваше и капитенот Мирко Ивановски кој на сите им посака успешна сезона, без повреди и исполнување на целите кои ќе бидат определени од Управата и фудбалерите. 
Екипата ќе тренира во Битола, без подготовки во друго место, а во втората фаза ќе одигра пријателски натпревари со Струга Трим Лум, Трајал Крушевац, Егалео, Охрид…
Пелистерци минатата сезона завршија на шестото место, а новата сезона ќе ја почнат на на 8, 9 или 10 август.
Промоцијата на новиот проект на ФК Пелистер започна назначување на новиот координатор на пионерско-младинската школа, Марјан Секуловски.
Текст и фото: Сашо Ристевски
