Бугарскиот град Самоков ќе биде домаќин на квалификацискиот турнир од Лигата на Шампионите од кои дел ќе биде и Пелистер од Битола , беше одлучено од страна на ФИБА Европа.
Една седмица по ждрепката што беше одржана во Лозана, ФИБА реши сите три квалификациски турнири да се играат на едно место – и тоа токму во Самоков, Бугарија.
Притоа, утврдени беа и официјалните календари и термини за одигрување на сите натпревари, па така Пелистер својот четвртфинален меч од групата против италијанската Реџо Емилија ќе го игра на 19 септември со почеток во 15.30 часот.
Доколку победи против Реџо Емилија, Пелистер во полуфиналето од турнирот ќе се сретне со победникот од мечот Орадеа (Романија) – Антверпен (Белгија), меч што би се играл на 21 септември во 13.15 часот.
