Еурофарм Пелистер 2 ги започна подготовките, борба за пласман во плеј-офот

Ракометарите на Еурофарм Пелистер 2 од Битола со одржување на работен состанок и првиот тренинг во новата година и официјално ги започнаа подготовките за пролетниот дел од оваа тековна ракометна сезона. Тренерот Александар Зарков на располагање ги имаше скоро сите ракометари од есенскиот дел, со кои ќе се обиде во последните четири кола од регуларниот дел на Суперлигата да се избори за плеј-офот.Тренерот Александар Зарков информираше дека подготовките ќе се одвиваат на домашно тло, а досега закажани се три контролни средби.-Комплетните подготовки ќе ги одработиме во Битола. Имаме програма како физички, така и тактички да ја подигнеме екипата. Во текот на подготовките ќе одиграме и контролни натпревари со Прилеп и Младост Богданци. До крајот на првиот дел од шампионатот има уште четири кола, од кои на две мораме да победиме – против Струга и Радовиш. Не зависи сè од нас, но шанси имаме. Нашето ќе го направиме на терен, ќе одиграме максимално посветено на сите натпревари и на сите ќе одиме на победа, изјави Зарков. Еурофарм Пелистер 2 ќе се подготвува во Битола, а екипата ќе тренира секојдневно во спортската сала „Боро Чурлевски“, а планирани се и три контролни натпревари. На 23 и 25 јануари Еурофарм Пелистер 2 ќе тестира со Прилеп, а на 30 јануари ќе се сретне со Младост во Богданци. Еурофарм Пелистер 2 презими на седмото место со 17 бода. Првиот официјален натпревар во 2026 година Еурофарм Пелистер 2 ќе го одигра на 7 февруари против Еурофарм Пелистер.