Кожув – Пелистер 85:95
Пелистер во второто коло од плејоф доигрувањето стигна и до втора победа, откако попладнево на гостински терен го совлада Кожув со резултат 85-95. „Зелено-белите“ одиграа исклучително квалитетно во нападот, а за разлика од претходниот дуел со овој ривал на кој предноста ја загубија во завршницата, овојпат „пелистерци“ одиграа квалитетни последни десет минути со кои практично си ја осигураа оваа заслужена победа.
Кожув подобро го отвори мечот, набрзина поведе со 6-0 и со 9-2, а Брејси Дејвис ги постигна првите четири поени за Пелистер. Домашниот тим имаше контрола до 17-8, но со тројката на Брејси Дејвис битолчани влегоа во посакуваниот ритам, набрзина топејќи ја негативата и преку Џенкинс стигнувајќи до првото водство на мечот (20-21).
Крстевски стрелаше прецизно за 20-24 за крај на првата четвртина, а Пелистер набрзина поведе со 22-29 на стартот од вториот период. Kожув се консолидираше, прд крајот на четвртината дури и поведе минимално, но Пелистер замина на пауза со предност од 46-47 по поените на Андреј Митревски.
Mалешевиќ и Џенкинс ја презедоа одговорноста на стартот од второто полувреме, набрзина носејќи водство од 50-58, по што домашниот тренер побара тајмаут. Koжув успеа да се врати со двете тројки во низа на Пурвис поведе со 65-64, но завршницата од четвртината мина во знакот на „пелистерци“, кои благодарение на Вилсон и на Митревски влегоа во последните десет минути со водство од 68-72.
Центарот Вилсон ги реализираше првите два напади на Пелистер во четвртата четвртина, што важна тројка постигна Дамјан Крстевски за 72-79. Серијата на Пелистер продолжи, па со тројката на Митревски „зелено-белите“ стигнаа до првото двоцифрено водство на мечот (74-84).
Малинков побара тајмаут за Кожув при негатива од 74-86, а по петте поени во низа Даскаловски побара тајмаутна 4:22 минути до крајот, при водство на Пелистер од79-86. Митревски и Брејси Дејвис постигнаа важни поени со кои го запреа завршниот обид за камбек на домашниот тим, по што Пелистер заслужено го доби овој натпревар со конечни 85-95.
Малешевиќ беше прв стрелец со 21 постигнат поен, Брејси Дејвис го заврши дуелот со 20 поени, Вилсон имаше 14, а Андреј Митревски 13 поени.
