Еурофарм Пелистер 2 во Битола ги започна подготовките за новата сезона со нов тренер и четири засолувања (фотогалерија)

-Бранислав Ангеловски ја започна мисијата со подмладениот состав, а капитенот Стефан Дрогришки ќе биде лидер на битолчани, а во стручниот штаб се Фарук Мемиќ и Филип Ивановски.Суперлигашот Еурофарм Пелистер 2 ги започна подготовките за новата сезона 2026/27 под водство на новиот тренер Бранислав Ангеловски, со одржување на прозивката, првиот состанок и тренинг и цел да направат исчекор и да бидат едно од најпријатните изненадувања во шампионатот.Во стручниот штб на Ангеловски ќе бидат Фарук Мемиќ (асистент тренер), Васко Димитровски (кондиционен тренер), Филип Ивановски (тренер на голмани) и Иванчо Тодоровски (физиотерапевт).Еден од најважните адути на тимот повторно ќе биде искусниот Стефан Дрогришки. Со богато искуство стекнато на домашната и европската сцена, вклучувајќи настапи и во Лигата на шампионите, Дрогришки ќе биде еден од лидерите на битолскиот состав.Новиот тренер Бранислав Ангеловски на првиот состанок порача дека покрај резултатите, една од главните цели ќе биде развојот на младите ракометари и нивна промоција во сениорскиот состав на актуелниот македонски вицешампион. Ангеловски истакна дека тимот е комбинација од младост и искуство и дека преку максимална работа на тренинзите очекува тоа да се преслика и на натпреварите.-Едноставната работа може да биде сложена доколку се експериментира. Ќе дадам сè од себе оваа екипа да го даде својот максимум на тренинзите, а со тоа и на натпреварите. Во ситуација сме на спој на младост и искуство, но резултатите не смеат да бидат во втор план. Единствена желба ми е сите играчи да останат здрави во текот на подготовките и сезоната за да го покажеме тоа што го знаеме. Исто така, сакам што повеќе момци од оваа група млади ракометари да заиграат во првиот тим на Еурофарм Пелистер, изјави Ангеловски.Новиот стратег откри и зошто подготовките ќе се реализираат во Битола.-Моја беше замислата да останеме во Битола, затоа што сакам овие момци да го почувствуваат градот. Веќе закажавме неколку пријателски натпревари, ќе учествуваме на турнирот во Прилеп, а на крајот од подготовките ќе одиграме натпревар против младата репрезентација на Иран во Скопје, додаде Ангеловски.Летово во Битола како засилувања дојдоа: Александар Стојков (Куманово), Марко Трајков (Пролет), Кристијан Симоноски (Алкалоид), Божидар Илиески (Прилеп).Од клубот заминаа: Мартин Јовановски, Азис Бен Махфуд, Ненад Белистојаноски, Петар Марковски, Одфред Баптист. Томче Пецаковски, Бојан Гичев, Јован Даневски.