Празнувањето во чест на светецот Свети Наум започнува уште ноќта на 2 јули кога многу верници се упатуваат во црквата “Св. Наум“ во Битола да се помолат и запалат свеќа за здравје, а тоа е традиција која се негува, според хроничарите на Битола, многу одамна, од минатиот век, па и во време на комунизмот.
За разлика од изминатите две годони, оваа година битолчани празнуваа без ковид-мерки, а во дворот на црквата за разлика од лани и преклани стоеја со свеќи и чекаа ред да се качат внатре кај иконата на Светецот. Битолчани кои беа вечерва во малата црква кај “Гроздот“ во Битола, чекаа стрпливо да стигнат до иконата на “Св. Наум“.
Вечерва во Битола, во црквата “Св. Наум“ верниците ќе се молат и бдеат цела ноќ за здравје, а болните за исцелување. Се смета дека чудотворните исцелителски моќи на Св. Наум им помогнале на многу луѓе кои верувале.
Имено, Св. Наум остана запаметен како чудотворец со моќта да лекува и за време на животот и по смртта, да лекува од најразлични болести и луѓе од различни вероисповести, односно сите што искрено и со верба му се обраќале без разлика на вера и припадност.
