Синоќа во салата на Офицерски дом во Битола беше отворена изложбата на Владимир Илиевски “Исчезнување“ на која беа претставено шест големи насликани платна со женски портрети, која е во рамките на “Битфест“.
Изложбата ја отвори директорката на Центарот на култура во Битола, Лили Бошевска, која рече дека иако изложбата се вика “Исчезнување“ ова е појавување на младиот автор со неговите прекрасни дела, кои се надева дека ќе предизвика голем интерес кај битолчани.
-Планот не беше да се појавиш. Ниту да исчезнеш. Но што е планот наспроти случувањето. А и како би исчезнало, ако не се појавило. Па на бело платно, изгорено дрво… и многу вода. Кога се обиде да ја измиеш нечистотијата, почна да исчезнуваш. Но застана. Тогаш, ниту те имаше, ниту те немаше… Како облак кој ниту е вода ниту лед. Како задржан здив, ниту вдишан ниту издишан. Исчезнувајќи – се појави, вели авторот Владимир Илиевски.
Владимир Илиевски е роден во 1989 г. во Скопје. Во 2012 г. дипломирал на Факултетот за ликовни уметности во Скопје на Катедрата за сликарство. Од 2012 до 2022 г. реализирал четиринаесет самостојни изложби во: Скопје, Охрид, Делчево, Струмица, Ботевград (Р. Бугарија) и Нови Сад (Р. Србија). Учествувал на повеќе групни изложби во земјава и странство. Автор е и на два мурали, во Скопје и во Струмица.
