Во амбиенталниот простор на Домот на АРМ во Битола или Офицерски дом, во рамките на Битолското културно лето, се одржа премиерата на најновиот седми по ред проект на битолската опера, мјузиклот “Опера хаус“ на задоволство на публиката, започна со своите сеќавања Димче Миновски, хроничар на Битола и доајен на битолското новинарство.
–“Опера хаус беше едно поинакво видување за тоа што во суштина претставува опера каде настапија оперските пејачи Нико Ѓоргиевски, Марина Коруновска, Денис Алитовски, актерите Валентина Грамосли и Борче Ѓаковски и други. Односно, битолски уметници кои се занимаваат со актерска игра, оперска, кои дадоа придонесот во визурата, но и во автентичниот простор на Домот на АРМ, кој има своја специфика, но и заборавен момент, а сметаме дека ќе треба да заживее во еден културен центар заради неговата акустичност, специфичност, уникатност, беше речено тогаш.
Тоа беше убава приказна од еден час и триесетина минути, во која се пееше и се играше за љубовт со една цел да претстави едно поинакво видување за тоа што во суштина претставува операта, односно мјузикл со оперски елементи и театарски елементи.
Ликовите во мјузиклот “Опера хаус“ егзистираат во оперска куќа – сцена каде постојат конвенционални правила на однесување. Тоа е свет, простор каде реалноста на ликовите станува кошмар. Ликовите се затекнати во несвојствени ситуации во кои мора да избираат меѓу материјалното и духовното, меѓу љубовта и омразата, убавото и грдото, реалноста и фикцијата.
