Вчера, во свечена атмосфера, го отворивме 16. издание на Фестивалот на музика од светот, фестивал што ја слави универзалната моќ на музиката и уметноста. Првата вечер, симболично насловена „Волкот на љубовта“, ги поврза зборот и музиката во единствена симфонија на емоции.
Вечерта започна со интерпретација на македонската поезија од поетот Тихомир Јанчовски, кој преку зборовите на нашите најголеми литературни имиња – Блаже Конески, Ацо Шопов, Петре М. Андреевски и други – ја воведе публиката во светот на љубовта и страста. Во вториот дел, Бранислав Николов со своите песни ги оживеа емоциите од златните времиња на македонската музичка сцена, додека Маја Андоновска Илијевски внесе своја уникатна енергија, што публиката ја прими со голем восхит.
