-На сцената на НТ Битола Гран-при наградата ја доби претставата “Кој сум јас” од Монголија на авторот и режисер Б. Батделгер и на актерката Јанјиндулам Рагкасурен, за најдобро актерско Салваторе Арена, и за најдобра режија Хорхе Лопез и Пати Доминик.
-Наградата на градот Битола која ја избира публиката според гласовите по изгледаните претстави за “Како мало зрно песок“.Од 12 мај до 20 мај, Битола беше град на театарски блесок, пречекувајќи талентирани актери од 11 земји кои на три различни фестивалски сцени прикажаа 13 извонредни монодрами, оставајќи ги гледачите маѓепсани од моќта на еден изведувач на сцената.
Под слоганот „Да се биде“, директорката на Центарот за култура кој е организатор на овој фестивал, Маја Андоновска Илијевски го изрази своето задоволство од успехот на овогодинешното издание.
-Ова беа денови на прослава на уметничкото изразување, покажувајќи ја уникатната способност на актерите да ја воодушеват публиката со своите соло изведби. Ние сме неизмерно горди што собравме таков спектар на таленти од целиот свет, а публиката не награди со полни гледалишта за сите претстави“, изјави таа синоќа на церемонијата на затварање и доделување на награди. Фестивалот не само што собра актери и театарски ентузијасти, туку доби и значајна поддршка од градот кој во деновите на фестивалот беше трансформиран и во отворена сцена на пантомимичари гости во офф програмата кои беа атракција низ битолскиот Широк Сокак и Старата битолска чаршија.
Градоначалникот на Битола Тони Коњановски го пофали фестивалот за неговиот придонес во културниот пејсаж на градот. Тој во своето обраќање во салата на свеченото затворање изјави:-Меѓународниот фестивал на монодрама стана симбол на посветеноста на Битола кон магијата на моноспектаклот. Ме радува фактот што во Битола, низ Широк Сокак и особено низ Старата битолска чаршија се чуствуваше присуството на актерите и нивните екипи од целиот свет. Најмногу од се радува исполнетоста на салите за време на изведбите на претставите. Радува дека и тоа дека покрај редовната битолска театарска публика која е предизвик за актерите, тука беше и младата публика која сега го гради својот став и критичност, а тоа значи дека останува љубовта кон театарот.
Стручното жири составено од театарската критичарка и драматург Нина Мазур која е Потпретседател на Интернационалниот Форум за Монодрама на UNESCO и актерите Николај Урумов и Сашко Коцев, на овогодинешниот фестивал ги додели официјалните награди.Сашко Коцев во име на Стручното жири пред да ги соопшти и образложи наградите рече:
-Да се биде жири на овој фестивал е чест но и голема одговорност посебно пред оваа битолска публика, пред која секогаш кога сме играле сме имале многу трема, зошто ова е публика со многу театаска традиција. Чест ми е што сум дел од жирито и посебно поради тоа што јас ќе ги соопштам наградите. Зад нас се седум восбудливи, театарски денови, кога можевме да споредиме театарски претстави од различни поднебја и да видиме кој со каков дух живее. За најдобро остварување во целост, Гран При наградата на ова издание на фестивалот ја доби претставата „Кој сум јас” од Монголија на авторот и режисер Б. Батделгер и на актерката Јанјиндулам Рагкасурен. Претстава која жирито ја доживеа буквално како нотите отсвирени на една харфа, нежна, емотивна, тивка и кревка. Актерскиот израз беше универзален и разбирлив и немаше никаква јазична бариера. Секој збор беше симфонија од чувства ставен во режисерскиот концепт кој беше суптилен и ненаметлив, кој беспрекорно оркестрираше опседнат перформанс истражувајќи ги длабочините на човечките емоции.
Наградата за најдобро актерско остварување ја доби Салваторе Арена, за улогата во претставата „Како мало зрно песок” од Италија, заради својот широк спектар на емоции на сцена кои ја освоиа едногласно и публиката и членовите на жири комисијата.Хорхе Лопез и Пати Доминик за претставата „Крвава свадба” од Шпанија за најдобра режија заради богатиот режисерски израз со многу симболи кои ја збогатија актерската игра на Марија Видал која со своите актерски вештини ги оживеа зборовите на Лорка.
Градоначалникот Коњановски ја додели наградата на градот Битола која ја избира публиката според гласовите по изгледаните претстави на претставата „Како мало зрно песок“ – Мана Чума Театар, Калабрија Регион, Италија Автор: Салваторе Арена и Масимо Барила Режија: Салваторе Арена Актер: Салваторе Арена.
Во чест на победниците, по официјалната церемонија на доделување на награди настапи велешкиот театар Јордан Х. К. Џинот со претставата „НЕМА СТРУЈА ЗА ЕЛЕКТРИЧНИОТ СТОЛ“ според текст на Александар Секуловм, драматург е Сашо Димовски, музиката е на Сашко Костов, а режисер е Дејан Пројковски.
Публиката синоќа во салата на Народниот театар во Битола ја покажа својата благодарност кон актерите со громогласен аплауз и овации додека додека се прогласуваа победниците. 24. Интернационален фестивал на монодрама.
Фото: Дамијана Ристевска