Дновиве пред 10 години: “Крани“ во 2016 кога со него стопанисуваше “Капри“ од Битола (фотогалерии)

-Фотографиите од Крани направени пред десети години зборуваат повеќе од илјада зборови. Тие сведочат за едно време кога плажата беше уредена, со лежалки, чадори и шанк покрај самото езеро, а водата на Преспанското Езеро беше значително надојдена. Во тие години, илјадници битолчани и посетители од поширокиот регион доаѓаа во Крани за да уживаат во природните убавини на Преспа, започна со своите сеќавања Димче Миновски, хроничар на Битола и доајен на битолското новинарство, кога му ги прикажавме фотографиите од 2016 година.Малку се местата кои на неколку стотини километри нудат ваква природна хармонија – езеро, плажа и планина на дофат. Со својата надморска височина и чист воздух, Преспа со децении важи за вистинска воздушна бања. Токму затоа голем број летувалци го избираа автокампот Крани, со кој стопанисуваше ресторанот „Капри“, за одмор и рекреација.Многумина од нив доаѓаа не само заради убавините на езерото, туку и заради благотворното влијание на климата врз здравјето. Воздухот и природната средина им помагаа на луѓе кои се соочуваа со заболувања на срцето, крвните садови и белите дробови.Во летните денови, посетителите уживаа во сончањето и капењето на песочната и плитка плажа, идеална и безбедна за најмладите.Така беше со години, се додека долгите сушни периоди не предизвикаа повлекување на водата. Езерото се оддалечи од плажата и шанкот, а сликата која со децении беше препознатлива за Крани постепено исчезна.Но, природата повторно покажа дека знае да изненади. По обилните врнежи во изминатиот период, на радост на жителите и туристите, Преспанското Езеро повторно се доближи до брегот и речиси ја достигна позицијата што ја имаше во 2016 година.Од 2024 и оваа 2026 година Автокампот Крани го стопанисува нов сопственик, кој вложува значителни напори за негово уредување и модернизирање. Големи промени се забележуваат и на плажата, која е под концесија на двајца млади ентузијасти. Оние што престојуваа тука минатото лето добро знаат дека секојдневно работеа на нејзино одржување, и покрај тоа што езерото од ден на ден сè повеќе се повлекуваше.Тие изградија шанк со освежителни пијалаци по пристапни цени, поставија лежалки и чадори и создадоа пријатен амбиент за посетителите. Во текот на летната сезона организираа забави и музички настани покрај едно од најубавите зајдисонца на Преспанското Езеро. Благодарение на нивната посветеност, и покрај нискиот водостој, плажата беше посетувана од голем број туристи и љубители на природата.Годинава, со враќањето на водата поблиску до брегот, оваа плажа добива сосема нов изглед. Посетителите ќе можат да уживаат во уште поубава, почиста и подобро организирана плажа, која повторно го враќа препознатливиот шарм на Крани и на овој дел од Преспа.Ова лето спомените повторно оживуваат. Не само преку старите фотографии, туку и преку новата слика на езерото кое се враќа таму каде што припаѓа. А нашиот фотообјектив ќе продолжи да ги бележи овие моменти, создавајќи нови фотографии кои ќе сведочат за природните промени и убавината на едно од највпечатливите места во Македонија.