Деновиве пред 10 години: трикотажа “Пелистер“ прослави 90 години постоење (фото)

-Наместо деновиве познатата текстилна фабрика “Трикотажа Пелистер“ од Битола да прослави голем јубилеј, 100 години постоење, таа денес е само уште една фирма од Битола која поради стечај останува да живее само во колективната меморија на битолчани, посебно во сеќавањата на илјадите вработени кои во некој нејзин период “ваделе леб“ од таму, започна со своите сеќавања Димче Миновски, хроничар на Битола и доајен на битолсктото новинарство.Инаку, се присеќава Миновски дека пред 10 години на 3 декември 2013 година во ресторанот “Белведере“, вработените во Трикотажата “Пелистер” прославија јубилеј, 90 години постоење.Тогаш по бројот на годините и кондицијата во која се наоѓаше фабриката беше единствена, не само во земјава, туку и пошироко.-Иако оваа, тогаш, успешна битолска компанија, како една од ретките во земјата од текстилните фирми ја преживеа транзицијата, опстана и бележеше успеси и резултати во работењето, не го преживеа времето кое следуваше, вели Миновски, кој додава:-Слоганот на “Трикотажа Пелистер“ беше “100% памук – 100% здравје“, а тоа беше прифатено од страна на потрошувачите, а притоа квалитетот беше главниот епитет по кој беа препознатливи не само на домашниот туку и на странските пазари.На тогашната прослава за 90 години од постоењето зборуваше, мојот пријател и голем стопанственик, кој за жал, не е повеќе со нас, Димитар Димитровски, тогаш во својство само на поранешен директор на  “Трикотажа Пелистер”.